Американската „Дура Аутомотив системс“ ќе отвори две нови фабрики во ТИРЗ Скопје 2, во кои ќе произведуваат компоненти за светските автомобилските компании
Станува збор за делови кои се потребни за електричните возила, односно нов вид на рамки за литиумски батерии и алуминиумски профили за батериски системи. Од Владата од каде велат дека фабриките почетно требало да се градат во Чешка, но по неколку средби со претставници на компанијата, била донесена одлука тие сепак да се градат во Македонија.
Директорот на ТИРЗ, Александар Младеновски кажа дека инвестицијата е во напредна фаза и дека изградбата на двете фабрики ќе започне на почеток на новата година.
Дура веќе има една фабрика во ТИРЗ 2 Скопје, а двете нови фабрики се очекува да започнат со работа во 2021 година. Во трите фабриките на Дура во земјава е предвидено да се вработат 1000 лица.
ДУРА Аутомотив Системс е една од водечките светски компании од автомобилскиот сектор со искуство од преку 100 години и ги опслужува најголемите производители на автомобили на Северно американскиот, Азискиот и Европскиот пазар.
Седиштето на компанијата е во Мичиген, во Соединетите Американски Држави и има 9.400 вработени во 33 фабрики и 12 инженерски центри во 12 земји во светот.
„Вкупниот обрт на DURA во 2019 година изнесуваше 1,4 милијарди долари, а Северна Македонија е тринаесеттата земја во која компанијата гради дури три фабрики. Вториот инвестициски проект во нашата земја ќе го реализира ДУРА Аутомотив Стракчрс. Фабриката во ТИРЗ Скопје 2 ќе произведува нов тип на алуминиумски рамки за литиумски батерии со голем капацитет за електрични возила. Фабриката ќе произведува компоненти за премиум класата на производители на автомобили. Петгодишниот инвестициски циклус (2019-2023) е проценет на повеќе од 48 милиони евра и ќе отвори 780 работни места“, истакна премиерот Зоран Заев при најавувањето на новата инвестиција.
