Од среда (29 април) микро, малите и средите претпријатија кои се погодени од корона кризата ќе можат да аплицираат за бескаматни кредити од Развојната банка. (За подетални информации за огласот за апслицирање погледнете на следниот линк)
Кредитите што ќе можат да ги добијат компаниите се од минимални 3.000 евра па до максимални 90. 000 евра.
Ова е втора линија на бескаматни кредити, наречена „Ковид 2“ и е дел од економските мерки на Владата за помош на фирмите кои се погодени од корона кризата и за зачувување на работните места.
Вкупната сума што е предвидена за овие кредити е 8 милиони евра, а средствата се обезбедени преку компензациските фондови од Јапонија, информираше министерката за финансии Нина Ангеловска, која денеска на прес конференција заедно со директорот на Развојната банка, Кире Наумов, ги презентираа условите и начинот на аплицирање.
Кои услови треба да се исполнуваат за да се аплицира за кредит?
За разлика од првата линија на бескаматни кредити „Ковид 1“, која беше наменета само за три сектори (угостителство, туризам и транспорт), „Ковид 2“, ќе можат да ги користат фирмите од сите сектори.
Главниот услов е фирмата да има за 30% намален приход во март 2020 во однос на март 2019 или во однос на просечните месечни приходи за 2019.
Компанијата што ќе аплицира треба да постои повеќе од половина година, да нема неплатени даноци и придонеси до 31 јануари 2020, да не е во постапка на стечај или ликвидација и да не спаѓа во категорија на исклучително ризични кредитобаратели.
Рокот на отплата на кредитот до 3 години, со грејс-период од 12 месеци и со обезбедување на меница.
Висината на кредитот ќе се определува според бројот на вработени според формулата:
Број на вработени помножен по 14 500 денари помножено по три (три месеци).
Оваа формула нема да важи за микрокомпаниите што имаат под 5 вработени – тие ќе добијат кредити од по 3 000 евра, иако според формулата сумата би била пониска, како и за оние од 128 до 250 вработени, кои според формулата ја надминуваат максимално предвидената сума за кредитот – тие ќе добијат кредити од 90 000 денари.
Аплицирањето за кредитите ќе биде електронски по имејл адресата kreditiranjecovid2@mbdp.com.mk објавена од Развојната банка.
Сите неопходни уверенија од УЈП, посочија на денешната прес-конференција, може да се побараат електронски преку системот за е-даноци, а од УЈП потоа ќе ги контактираат фирмите кога ќе може да се подигнат.
Дополнително, Централниот регистар и Развојната банка денеска склучиле договор за интернет-дистрибутивен систем специјално за „Ковид 2“, со што од регистарот бесплатно ќе се даваат документите за тековна состојба, потврда за стечајна и ликвидациона постапка и листинг од завршна сметка за 2019.
Фирмите нема потреба да одат ниту во Централниот регистар бидејќи со договорот, како што беше презентирано, е предвидено документите кои им се потребни вработените во Развојната банка електронски да ги преземаат од Централниот регистар.
Директорот на Развојната банка Кире Наумов денеска апелираше фирмите кои во последните десетина дена аплицирале за кредитите од првиот пакет – „Ковид 1“, да аплицираат и за „Ковид 2“, бидејќи средствата од првиот пакет се при крај, а одобрувањето е по принципот прв дојден-прв услужен.
Министерката за финансии Ангеловска вели дека имало голем интерес, односно одобрени се апликации од 254 компании во кои се вработени околу 3 000 лица, а вкупната сума одобрена за овие кредити е 2,2 милиони евра.
Меѓутоа, Директорот на развојната банка Кире Наумов најави дека денеска или утре до Владата ќе се достави нова група на барања за кредити за уште 2,2 милиони евра.
Со тоа вкупната сума на искористеност на средства од 5,7 милиони евра ќе достигне 4,4 милиони евра, а бројот на компании ќе се искачи на 583 во кои работат над 5 000 лица.
